សៀមរាប៖ អាជ្ញាធរជាតិអប្សរាបានបញ្ជាក់ថា ត្រីដែលបានងាប់នៅកសិន្ធុទឹកប្រាសាទអង្គរកាលពីថ្ងៃទី៣ ខែវិច្ឆិកា ម្សិលមិញ ជាប្រភេទ Araparima ដែលមានប្រភពពីតំបន់អាម៉ាហ្សូន មិនមែនជាត្រីក្នុងស្រុកនោះទេ។ តាមការពិនិត្យត្រីនេះជាត្រីដែលត្រូវគេលួចយកមកព្រលែងក្នុងកសិន្ធុប្រាសាទ។

ក្នុងសេចក្ដីប្រកាសព័ត៌មានចុះថ្ងៃទី៤ ខែវិច្ឆិកា ឆ្នាំ២០២២ អាជ្ញាធរអប្សរាបានសន្និដ្ឋានតាមអ្នកជំនាញផ្នែកជលផលថា ត្រីនេះបានងាប់ដោយសារធម្មជាតិមិនមែនជាករណីជាប់មង ឬប្រការអ្វីផ្សេងទេ។ បន្ថែមលើនេះអជ្ញាធរអប្សរាក៏បានឱ្យដឹងដែរថា ត្រីប្រភេទនេះជាត្រីដែលស៊ីត្រីតូចជាងខ្លួនជាអាហារ និងបានអំពាវនាវកុំឱ្យមានការយកត្រីដែលមិនមែនជាត្រីក្នុងស្រុកបែបនេះចូលកសិន្ធុអង្គរទៀតផងដែរ។

ក្នុងសេចក្ដីប្រកាសព័ត៌មានលើកឡើងថា៖ «នាពេលកន្លងមកអាជ្ញាធរជាតិអប្សរាធ្លាប់បានចេញសេចក្ដីប្រកាសណែនាំ ហាមឃាត់ការព្រលែងត្រីងក្នុងកសិន្ធុ ដែលពុំមែនជាប្រភេទត្រីក្នុងស្រុក ពីព្រោះសកម្មភាពនេះអាចនាំឱ្យមានការបាត់បង់ពូជត្រីធម្មជាតិក្នុងស្រុកផងដែរ»។

បើតាមអាជ្ញាធរអប្សរាត្រីដែលងាប់នោះមានប្រវែង ២,១៥ម៉ែត្រ ទទឹង ០,៤០ម៉ែត្រ និងត្រូវបានមន្ត្រីជំនាញយកទៅកប់នៅផ្នែកខាងជើងនៃកសិន្ធុប្រាសាទអង្គរវត្ដរួចហើយផងដែរកាលពីម្សិលមិញ៕